2897 - Single_lajmi | Keshilli Prokurorial i Kosoves

Reagim i Këshillit Prokurorial për kërcënimet e përsëritura ndaj prokurorit Rasim Maloku

Prishtinë, 19 shkurt 2020 – Këshilli Prokurorial i Kosovës dënon fuqishëm kërcënimin e vazhdueshëm, përfshirë edhe kërcënimin e sotëm ndaj Prokurorit të Departamentit për Krime të Rënda të Prokurorisë Themelore në Ferizaj, Rasim Maloku, si dhe familjes së tij.

Këto kërcënime të vazhdueshme ndaj prokurorit janë plotësisht të papranueshme dhe kanë për qëllim që të mbjellin frikë te prokurorët dhe familjet e tyre, si dhe bëhen me qëllim që ata të ndihen të pasigurt në ushtrimin e funksioneve të tyre kushtetuese dhe ligjore.

Këshilli Prokurorial i Kosovës siguron opinionin publik se asnjë kërcënim nuk do t’i zmbrapsë prokurorët e shtetit që të punojnë për sundimin e rendit dhe ligjit dhe për fuqizimin e shtetit ligjor, andaj u bëjmë thirrje organeve të sigurisë që këtë rast ta trajtojnë me seriozitetin më të lartë dhe të gjitha ata të cilët qëndrojnë prapa këtyre kërcënimeve t’i nxjerrin para drejtësisë.